"Saç yeyən uşaq" əməliyyat olunub

30 iyul 2025-ci il tarixində Qax rayon sakini, 2016-cı il təvəllüdlü 9 yaşlı qız Kliniki Tibbi Mərkəzə qarın ağrısı, ürəkbulanma və iştahsızlıq şikayətləri ilə yerləşdirilib. Radioloji müayinələr nəticəsində uşağa tirixofagiya – mədədə saç kütləsi (bezoar) diaqnozu qoyulub. Bu barədə Kliniki Tibbi Mərkəz məlumat yayıb.

Pasiyent Uşaq Cərrahiyyə şöbəsinə yerləşdirilib və şöbə müdiri İlqar Haqverdiyev ilə cərrah Binnət Sofiyevin iştirakı ilə qastrotomiya əməliyyatı aparılıb. Əməliyyat zamanı mədədən saç kütləsi uğurla xaric edilib.

Hazırda uşağın vəziyyəti stabil olaraq qiymətləndirilir, müalicəsi xəstəxanada davam etdirilir.

Mütəxəssislərin bildirdiyinə görə, tirixofagiya adətən psixoloji pozuntu nəticəsində yaranır və bu zaman uşaq öz saçlarını və ya ətrafda olan tükləri yeyir. Uzun müddət ərzində bu vərdiş mədədə böyük həcmli tük kütləsinin yığılmasına səbəb olur və nəticədə həzm pozuntuları, qarında şişkinlik, iştahsızlıq və qusma kimi əlamətlər müşahidə edilir.

Gülnar