Çin və Yaponiya şirkətləri Qarabağda istehsal imkanları ilə maraqlanır - Emin Hüseynov

Çin və Yaponiya şirkətləri Qarabağda istehsal və emal müəssisələrinin yaradılması imkanlarına maraq göstərir. Bunu Ağdam, Füzuli və Xocavənd rayonlarında Azərbaycan Prezidentinin xüsusi nümayəndəsi Emin Hüseynov II Azərbaycan Beynəlxalq İnvestisiya Forumu çərçivəsində anews.az-a açıqlamasında deyib.

Onun sözlərinə görə, Çin şirkətləri son vaxtlar tikinti və prefabrik materialların Azərbaycanda istehsalı və emalı ilə bağlı təkliflər təqdim ediblər.

“Bu təkliflər tikintinin sürətinin və keyfiyyətinin artırılmasına yönəlib. Biz şirkətlərin biznes planlarını, iqtisadi və maliyyə dayanıqlığını qiymətləndiririk”, - Hüseynov jurnalistlərə deyib.


Hüseynov deyib ki, Yaponiya və Türkiyə şirkətləri də bölgədə layihələrə maraq göstərir. Slovakiya şirkətləri isə Ağdam rayonunun Baş Qərvənd kəndinin tikintisində iştirak edir.

Onun sözlərinə görə, hazırda Qarabağda tamamilə xarici kapital əsasında fəaliyyət göstərən şirkət yoxdur.

Xarici şirkətlər əsasən yerli tərəfdaşlarla birgə müəssisələr və ya təchizatçı kimi çalışırlar.
Hüseynov əlavə edib ki, xarici investorlarla hər ay səfirliklər və şirkətlərin özləri vasitəsilə görüşlər keçirilir, səfərlər və “roadshow”lar təşkil olunur.

Ağdam Sənaye Parkında 30-dan çox rezident qeydiyyatdan keçib, onlardan doqquzu istehsala başlayıb.


Hüseynovun sözlərinə görə, Xankəndi, Xocalı, Ağdərə və Xocavənddə, xüsusilə kənd təsərrüfatı və emal sahələrində fəaliyyət göstərmək istəyən sahibkarların sayı artır.

O bildirib ki, əhalinin bölgəyə köçürülməsi işçi qüvvəsinin, istehlak bazasının və infrastrukturun formalaşmasını sürətləndirəcək, bu isə yeni sənaye və emal müəssisələrinin yaradılmasına şərait yaradacaq.

Gülnar Nazimqızı