201 nömrəli məktəbin direktoru Afaq Əliyeva vəzifəsindən azad edilib

Məktəbəqədər və Ümumi Təhsil üzrə Agentliyin direktoru Eşqi Bağırovun əmri ilə Bakı şəhəri 201 nömrəli tam orta məktəbin direktoru Afaq Əliyeva fəaliyyətində yol verdiyi nöqsanlara görə vəzifəsindən azad edilib. Bu barədə qurumdan bildirilib. 

Əliyevaya qarşı intizam tədbiri bu ilin iyulunda tətbiq olunub. O zaman Əmək Məcəlləsinin 186-cı maddəsinin 2-ci hissəsinin “a” bəndinə əsasən – vəzifə öhdəliklərini keyfiyyətsiz yerinə yetirdiyinə görə – ona rəsmi töhmət verilmişdi. Qurum tərəfindən xəbərdarlıq edilmişdi ki, oxşar hallar təkrarlandığı halda daha ciddi intizam tədbiri görüləcək.

Qərar, təhsil müəssisələrində aparılan monitorinqlər zamanı aşkar edilən nöqsanlar əsasında qəbul olunub. Agentlik bildirib ki, yoxlamalar davamlı xarakter daşıyır və qanunvericiliyə uyğun tədbirlərin görülməsi təmin olunur.

Gülnar Nazimqızı