Bəzi yerlərə yağış yağıb -faktiki hava açıqlanıb

Oktyabrın 24-ü səhər saatlarına olan məlumata əsasən, Azərbaycan ərazisinin əksər bölgələrində hava şəraiti yağıntılı keçib, bəzi yerlərdə leysan xarakterli güclü yağış yağıb, yüksək dağlıq ərazilərə isə qar düşüb. Bu barədə Ekologiya və Təbii Sərvətlər Nazirliyinin Milli Hidrometeorologiya Xidməti məlumat yayıb.

​Qurumun verdiyi xəbərə görə, Şahdağ və Kəlbəcərin yüksək dağlıq ərazilərində qar örtüyü əmələ gəlib, Şahdağda qarın hündürlüyü 3 santimetrə çatıb.

​Ən çox yağıntı Şəki (Kişçay – 47 mm) və Zaqatala (44 mm) rayonlarında qeydə alınıb. Bakıda və Abşeron yarımadasında düşən yağıntının miqdarı 7 mm-dək olub.

​Bundan əlavə, oktyabrın 23-ü gecə saatlarında Şəki rayonunun Oxud və Kişçay kəndlərinə diametri 5-7 mm olan dolu düşdüyü bildirilir.