Nazir: Azərbaycan–İsrail münasibətləri ildən-ilə dərinləşir

Azərbaycanla İsrail arasında ikitərəfli münasibətlər ilbəil inkişaf edir və yüksək səviyyəli qarşılıqlı səfərlər bu prosesdə xüsusi əhəmiyyət daşıyır. Bunu Azərbaycanın xarici işlər naziri Ceyhun Bayramov israilli həmkarı Gideon Saar ilə birlikdə Bakıda keçirilən mətbuat üçün brifinqdə deyib.

Onun sözlərinə görə, iki ölkənin xarici işlər nazirlikləri arasında siyasi məsləhətləşmələr, strateji dialoq mexanizmləri, eləcə də iqtisadi komissiyaların iclasları əməkdaşlığın əsas dayaqlarını təşkil edir.

Hazırda İsrailin 124 şirkəti Azərbaycanda fəaliyyət göstərir.

 Bayramov qeyd edib ki, 2025-ci ildə Azərbaycan–İsrail əlaqələri ilk dəfə olaraq enerji resurslarının tədarükü çərçivəsindən kənara çıxıb və SOCAR Aralıq dənizində icra olunan layihədə 10 faiz pay əldə edib.

Nazir nəqliyyat və kənd təsərrüfatı sahələrinin də ikitərəfli əməkdaşlıqda xüsusi əhəmiyyət kəsb edən istiqamətlər kimi dəyərləndirildiyini vurğulayıb.

Ceyhun Bayramov əlavə edib ki, 2025-ci ilin ilk 11 ayı ərzində İsraildən Azərbaycana gələn turistlərin sayı 2024-cü ilin eyni dövrü ilə müqayisədə iki dəfədən çox artıb.

Gülnar Nazimqızı