Şəmkir icra hakimiyyətində də kütləvi ixtisarlar olub

Azərbaycanın Şəmkir Rayon İcra Hakimiyyətində aparılan struktur dəyişiklikləri çərçivəsində 53 vəzifə ləğv olunub və müvafiq əməkdaşlar işlərini itirib.

Oxu.az xəbər verir ki, icra başçısı Rəşad Tağıyev sərəncamı ilə həmin şəxslər dövlət qulluğuna xitam verilib və ehtiyat kadr siyahısına əlavə olunub. Vəzifələri ləğv edilənlərdən 7 nəfər icra hakimiyyətinin əlaqədar qurumlarında işlə təmin edilsə də, 46 nəfər ehtiyat kadr siyahısında qalıb.

Məlumata görə, vəzifəsini itirənlərdən 48 nəfər kənd inzibati ərazi dairəsi üzrə nümayəndələrin müavini və nümayəndəliklərin baş məsləhətçi–baş mühasibi olub. Digər şəxslər isə icra hakimiyyətində müxtəlif vəzifələrdə çalışıblar.

Qeyd olunur ki, Azərbaycanda digər rayon icra hakimiyyətlərində aparılan struktur dəyişiklikləri nəticəsində son dövrlərdə işini itirənlərin sayı aşağıdakılardır: Ağsu – 14, Tovuz – 43, Cəlilabad – 38, Quba – 36, Göyçay – 27, Lənkəran şəhər – 44, Bərdə – 43, Ağdam – 54 əməkdaş.