Əsədov Orta Dəhliz və Zəngəzur dəhlizinin strateji əhəmiyyətini vurğulayıb

Türk dünyasının geostrateji mövqeyi ölkələr üçün böyük üstünlüklər yaradır. Bunu baş naziri Əli Əsədov bildirib. 

 “Avropa ilə Asiyanı birləşdirən, Şərq-Qərb və Şimal-Cənub istiqamətlərinin kəsişməsində yerləşən region beynəlxalq nəqliyyat və logistika baxımından mühüm əhəmiyyətə malikdir. Bu potensialdan daha səmərəli istifadə etmək üçün nəqliyyat bağlantılarının inkişafı və tranzit imkanlarının genişləndirilməsi əsas prioritetlərdən biridir”, - baş nazir deyib. 

Əsədov Orta Dəhlizin önəmini xüsusi vurğulayıb.

 “Son dövrdə bu marşrut Avrasiyanın nəqliyyat xəritəsində ən perspektivli, təhlükəsiz və etibarlı bağlantı xətlərindən birinə çevrilməkdədir. Birgə səylərimiz nəticəsində Orta Dəhliz üzrə tranzit daşımalar davamlı olaraq artmaqdadır. 2025-ci ildə bu artım təxminən 11%-ə yaxın təşkil etmişdir (5 milyon ton)”, - o əlavə edib. 

Baş nazir bildirib ki, Azərbaycan Orta Dəhlizin inkişafına böyük sərmayələr yatırıb, müasir nəqliyyat və logistika infrastrukturu yaradıb.

Onun sözlərinə görə, Xəzər dənizində ticarət donanmasının gücləndirilməsi, beynəlxalq dəniz limanı imkanlarının artırılması, dəmir yolu və avtomobil yolu infrastrukturunun yenilənməsi, logistika mərkəzlərinin yaradılması bu istiqamətdə atılmış mühüm addımlardır.

Əsədov əlavə edib ki, üzv dövlətlər arasında koordinasiyanın gücləndirilməsi, sərhəd-gömrük prosedurlarının sadələşdirilməsi, rəqəmsal həllərin tətbiqi və tarif siyasətinin uyğunlaşması Orta Dəhlizin rəqabət qabiliyyətini daha da artıracaq.

O həmçinin Zəngəzur dəhlizinin strateji əhəmiyyətinə diqqət çəkib.

 “Bu layihənin önəmi yalnız Azərbaycanın əsas hissəsi ilə Naxçıvan Muxtar Respublikası arasında maneəsiz əlaqənin təmin olunması ilə məhdudlaşmır. Layihə həm də bütün türk dünyasının birləşdirilməsi və region üçün yeni nəqliyyat və kommunikasiya imkanlarının açılması baxımından strateji əhəmiyyətə malikdir”, - baş nazir bildirib. 

Aytac