ABŞ İranın təklifinə cavab hazırlayır

Ağ Ev İrandan daxil olan və hərbi əməliyyatların dayandırılmasına yönəlmiş təşəbbüsə cavab olaraq öz əks təkliflərini yaxın günlərdə təqdim etməyə hazırlaşır. 

Reuters agentliyinin adı açıqlanmayan amerikalı rəsmiyə istinadən verdiyi məlumata görə, ABŞ prezidenti Donald Trump Tehranın təqdim etdiyi sənədə şübhə ilə yanaşır və ondan narazıdır. Narazılığın əsas səbəbi təklifdə İranın nüvə proqramına toxunulmamasıdır.

Məlumata görə, İranın xarici işlər naziri Abbas Araqchi tərəfindən Pakistan vasitəsilə çatdırılan sənəd bazar ertəsi günü Ağ Evdə prezident və onun müşavirləri ilə müzakirə edilib.

Mənbə bildirib ki, Tramp təklifin hazırkı formasının Vaşinqton üçün strateji əhəmiyyət daşıyan əsas məsələləri əhatə etmədiyini vurğulayıb.

Beləliklə, Tehran hərbi gərginliyi azaltmaq və atəşkəsə nail olmaq istiqamətində addımlar atsa da, Vaşinqton nüvə proqramını da əhatə edən daha geniş və hərtərəfli razılaşmanın zəruri olduğunu bildirir.

Gülnar