ABŞ Konqresində Trampa qarşı iddia ehtimalı müzakirə olunur

ABŞ Konqresində demokratlar prezident Donald Trumpın İrana qarşı hərbi əməliyyatları qanunvericilərin icazəsi olmadan davam etdirəcəyi təqdirdə ona qarşı məhkəmə iddiası qaldırmağı nəzərdən keçirirlər. Bu barədə Time jurnalı yazıb. 

Demokrat senator Richard Blumenthal bildirib ki, “məhkəmə iddiası ehtimalı nəzərdən keçirilməlidir”. Nümayəndələr Palatasının üzvü Ted Lieu isə belə bir prosesi tam dəstəklədiyini və güclü hüquqi arqumentlərin mövcud olduğunu qeyd edib.

Digər senator Adam Schiff bu həftə hərbi səlahiyyətlər qətnaməsi ilə bağlı yenidən səsvermə keçirməyi planlaşdırdığını açıqlayıb. O vurğulayıb ki, məsələ ilə bağlı mövqeyini bildirən respublikaçılar bunu səsvermədə nümayiş etdirmək imkanı əldə edəcəklər.

Nəşrin məlumatına görə, Trampa qarşı mümkün iddia ilə bağlı müzakirələr hələ ilkin mərhələdədir. Lakin prezident 60 günlük müddət bitdikdən sonra İrana qarşı əməliyyatları davam etdirərsə, bu müzakirələrin intensivləşə biləcəyi istisna edilmir.

Müharibə Səlahiyyətləri Qanunu (1973)na əsasən, Konqresin icazəsi olmadan prezidentlər 60 gündən artıq hərbi əməliyyatlar apara bilməzlər. Bu müddət yalnız xüsusi şərtlərlə 30 gün uzadıla bilər.

ABŞ İrana qarşı hərbi əməliyyatlara fevralın 28-də başlayıb və 60 günlük müddət aprelin 29-da başa çatır. Jurnal qeyd edir ki, prezidentin Konqresdən təsdiq almaq üçün son tarix 1 may hesab olunur.

Gülnar