Hörmüz boğazı böhranı Türkiyəyə 24 milyard dollara qədər əlavə xərc yarada bilər

 Hörmüz boğazında mümkün gərginlik və ya bağlanma ssenarisi ölkənin enerji idxalı xərclərini əhəmiyyətli dərəcədə artıra bilər. Bunu Türkiyənin enerji naziri Alparslan Bayraktar bildirib.

Bayraktar çərşənbə axşamı jurnalistlərə açıqlamasında qeyd edib ki, neft qiymətlərinin orta hesabla 100 dollar səviyyəsində qalacağı halda Türkiyənin əlavə enerji xərcləri ilin sonunadək təxminən 13,6 milyard dollar təşkil edəcək. Qiymətlərin 125 dollara yüksəlməsi halında isə bu göstərici 24 milyard dollara çata bilər.

“Bunlar əlavə xərclərdir,” – nazir bildirib.

Onun sözlərinə görə, mümkün böhran Türkiyə dövlət büdcəsinə də ciddi təsir göstərə bilər və təxminən 600 milyard türk lirəsi (təxminən 13,3 milyard dollar) həcmində vergi itkisi riski yaradır.

Hörmüz boğazı qlobal neft ticarətinin əsas tranzit marşrutlarından biri hesab olunur və dünya neft axınının əhəmiyyətli hissəsi bu su yolundan keçir.

Gülnar Nazimqızı