Şahzadə - Biz fond olaraq 600 ailəni evlə təmin etmişik

Mənzil siyasətinin məqsədi yalnız insanlara yaşayış sahəsi təqdim etmək deyil, ailələrin iqtisadi müstəqilliyini və ləyaqətli həyatını təmin etməkdir. Bunu HRH Şahzadə Lamia bint Majed Al Saud, UN-Habitat-ın Ərəb Dövlətləri üzrə Regional Xoşməramlı Səfiri bildirib.

Bakıda keçirilən Ümumdünya Şəhərsalma Forumunda (WUF13) çıxış edən şahzadə qeyd edib ki, ailələrin sosial və iqtisadi dayanıqlılığı mənzil layihələrinin əsas hissəsinə çevrilməlidir.

Onun sözlərinə görə, rəhbərlik etdiyi fond UNHCR ilə birlikdə Yəmənli ailələr üçün 600 mənzil vahidi təqdim edib, lakin layihə yalnız evlərin verilməsi ilə məhdudlaşmayıb.
“Biz ailələr üçün təlim proqramları təşkil etdik və nəticədə təxminən 5 min benefisiar iş imkanları əldə etdi. İnsanlara sadəcə evin açarını vermək kifayət deyil. Onlara işləmək, gəlir əldə etmək və öz həyatlarını qurmaq imkanı yaradılmalıdır”, -  o bildirib.

Şahzadə Lamia vurğulayıb ki, 2030-cu ilə qədər dünya əhalisinin 60%-nin şəhərlərdə yaşayacağı gözlənilir və bu səbəbdən hökumətlərin bütün yükü təkbaşına daşıması mümkün olmayacaq.

O bildirib ki, dayanıqlı mənzil siyasəti dövlətlər, beynəlxalq təşkilatlar və özəl sektor arasında tərəfdaşlıq tələb edir.

“Biz layihələrdə üç əsas prinsipə üstünlük veririk: dayanıqlılıq, beynəlxalq əməkdaşlıq və innovasiya ilə maliyyə dəstəyi. Məqsəd yalnız mənzil tikmək deyil, bütöv bir sosial sistem yaratmaqdır”, - HRH Şahzadə Lamia bint Majed Al Saud əlavə edib.

Gülnar Nazimqızı