Natalia Amburtseva: Dağ yaşayış məntəqələrində əhalinin azalması əsas problemlərdən biridir

MDB-yə üzv ölkələrdə dağ və kənd yaşayış məntəqələrinin inkişafı məkan inkişafı siyasətinin əsas istiqamətlərindən biridir. Bunu MDB Parlament Assambleyasının Aqrar siyasət, təbii ehtiyatlar və ekologiya üzrə daimi komissiyasının katibi Natalia Amburtseva bildirib.

Onun sözlərinə görə, MDB ölkələri məkan inkişafı və kənd ərazilərinin inkişafı sahəsində oxşar problemlərlə üzləşir ki, bu da yanaşmaların uzlaşdırılmasını zəruri edir.

Amburtseva qeyd edib ki, MDB Parlament Assambleyası tərəfindən qəbul olunan “Dağ ərazilərinin inkişafı və mühafizəsi haqqında” model qanun və “MDB iştirakçısı olan dövlətlər üçün dağ ərazilərinin dayanıqlı inkişafı konsepsiyası” regionlararası və sərhədyanı əməkdaşlıq proqramlarına daxil edilib.

O bildirib ki, 2023-2025-ci illərdə keçirilən “Dağ ərazilərinin dayanıqlı inkişafı” beynəlxalq forumu da bu məsələlərin müzakirəsi üçün mühüm platformaya çevrilib.


Amburtsevanın sözlərinə görə, dağlıq ərazilərdə əsas problemlərdən biri əhalinin miqrasiyası və yaşayış məntəqələrinin boşalmasıdır.

“Bu gün diqqətimizi əsasən sosial-iqtisadi, infrastruktur və demoqrafik amillərə yönəltməliyik”, - o deyib.

O əlavə edib ki, dağ ərazilərinin inkişafı ilə bağlı qərarlar qəbul edilərkən təbii-coğrafi xüsusiyyətlər, tarixi inkişaf, ənənəvi təsərrüfat fəaliyyəti və dağlarda yaşayan əhalinin həyat tərzi nəzərə alınmalıdır.

Gülnar Nazimqızı