Azərbaycanın dağ regionlarının inkişafında geniş təcrübəsi var - deputat

Azərbaycan müasir, təhlükəsiz və ekoloji dayanıqlı şəhərlərin yaradılmasına yönəlmiş genişmiqyaslı dövlət siyasəti həyata keçirir və bu strategiyada işğaldan azad edilmiş ərazilərin bərpası xüsusi yer tutur. Bunu Milli Məclisin deputatı Fatma Yıldırım Bakıda keçirilən WUF-13 çərçivəsində çıxışı zamanı deyib.

Onun sözlərinə görə, Prezident İlham Əliyevin rəhbərliyi ilə Qarabağ və Şərqi Zəngəzur iqtisadi rayonlarında innovasiyalar, yaşıl enerji, rəqəmsal texnologiyalar və dayanıqlı infrastruktur prinsiplərinə əsaslanan “ağıllı şəhər” və “ağıllı kənd” modeli formalaşdırılır.
Deputat bildirib ki, bu proses yalnız genişmiqyaslı tikinti layihəsi deyil, həm də işğaldan azad edilmiş torpaqlarda həyatın, mədəniyyətin, sosial ədalətin və tarixi yaddaşın bərpasıdır.

Fatma Yıldırım qeyd edib ki, dağ yaşayış məntəqələrinin və ucqar regionların inkişafına da xüsusi diqqət yetirilməlidir.

Onun sözlərinə görə, bir çox ölkələrdə dağlıq ərazilər infrastruktur, nəqliyyat, təhsil və səhiyyə xidmətlərinə çıxış baxımından çətinliklərlə üzləşir.

Deputat vurğulayıb ki, Azərbaycanın dağ regionlarının inkişafı sahəsində zəngin təcrübəsi var və ölkədə sosial infrastrukturun yaxşılaşdırılması, yeni iş yerlərinin yaradılması, ekoturizmin inkişafı, təbii və mədəni irsin qorunmasına yönəlmiş proqramlar həyata keçirilir.

“Müasir şəhərlər ilk növbədə insanın həyat keyfiyyətidir. Biz yalnız binaların və yolların tikintisindən deyil, inklüziv mühitin, əlçatan təhsilin, mədəni inkişafın, ekoloji təhlükəsizliyin və sosial dayanıqlığın formalaşdırılmasından danışmalıyıq”, - deputat bildirib.

Gülnar Nazimqızı