Rasim Bağırov: Media dayanıqlı şəhər inkişafında ictimai etimadın güclənməsinə xidmət edir

Media dayanıqlı və inklüziv şəhər inkişafında dövlət qurumları ilə cəmiyyət arasında mühüm körpü rolunu oynayır.
Bunu Beynəlxalq Münasibətlər və Diaspor Araşdırmaları Mərkəzinin direktoru Rasim Bağırov bildirib.
Onun sözlərinə görə, sürətli urbanizasiya, iqlim çağırışları, demoqrafik artım, miqrasiya və sosial dəyişikliklər yalnız dayanıqlı şəhər siyasəti deyil, həm də ictimai iştirak və inklüziv dialoq tələb edir.

Bağırov qeyd edib ki, media artıq təkcə informasiya yayımı platforması deyil, ictimai şüurun formalaşdırılması, vətəndaş iştirakının təşviqi və dövlət institutları ilə cəmiyyət arasında kommunikasiyanın gücləndirilməsi vasitəsidir.

“Dayanıqlı şəhərlər yalnız infrastruktur və iqtisadi investisiyalar hesabına qurula bilməz. Bunun üçün məlumatlı icmalar, şəffaf kommunikasiya və dövlət qurumları ilə vətəndaşlar arasında konstruktiv əməkdaşlıq vacibdir”, - Bağırov bildirib.

O vurğulayıb ki, şəhər inkişafı, mənzil siyasəti, ekoloji risklər və sosial çağırışlar barədə məlumatların düzgün təqdim olunması ictimai etimada və qərarların qəbulunda vətəndaş iştirakına birbaşa təsir göstərir.

Bağırov həmçinin Prezident İlham Əliyevin 2021-ci ilin yanvarında media sahəsində islahatların dərinləşdirilməsi ilə bağlı imzaladığı fərmanın Azərbaycanda medianın inkişafına verilən önəmi göstərdiyini bildirib.

Onun sözlərinə görə, urbanizasiya, mənzil təminatı, əlçatanlıq, ekoloji məsuliyyət və sosial inklüzivlik məsələlərinin obyektiv işıqlandırılması şəhər idarəçiliyində şəffaflıq və hesabatlılığın güclənməsinə, eləcə də daha məlumatlı qərarların qəbuluna dəstək verir.

Gülnar Nazimqızı