Bahar Muradova: Mənzil siyasəti gender bərabərliyi və qadınların təhlükəsizliyi baxımından strateji əhəmiyyət daşıyır

Mənzil siyasəti yalnız yaşayış sahəsinin təmin edilməsi deyil, həm də qadınların təhlükəsizliyi, sosial müdafiəsi və fundamental hüquqlarının qorunması məsələsidir. Bunu Ailə, Qadın və Uşaq Problemləri üzrə Dövlət Komitəsinin sədri Bahar Muradova WUF13 çərçivəsində keçirilən müzakirədə bildirib.

Onun sözlərinə görə, mənzil insan ləyaqəti, sağlamlıq, təhlükəsizlik və sosial inklüzivliyin əsas sütunlarından biridir. Lakin qlobal miqyasda sistemli problemlər milyonlarla insanın bu hüquqlardan tam istifadə etməsinə mane olur.
Muradova bildirib ki, qadın başçılıq etdiyi ailələr, məcburi köçkün qadınlar, yaşlı qadınlar, əlilliyi olan qadınlar və qeyri-formal məşğulluqda çalışan qadınlar daha böyük çətinliklərlə üzləşirlər.

“Gender əsaslı zorakılıq hallarında təhlükəsiz və adekvat mənzilin olmaması qadınları zorakı mühitdə qalmaq və ya evsiz qalmaq riski ilə üz-üzə qoyur,” - Muradova qeyd edib.

O vurğulayıb ki, gender-transformativ mənzil siyasətlərinin şəhərsalma strategiyalarına inteqrasiyası xüsusi aktuallıq kəsb edir.

Onun sözlərinə görə, formal olaraq gender baxımından neytral görünən siyasətlər praktikada hər zaman bərabər nəticələr vermir.

Muradova bildirib ki, siyasətlərin hazırlanması və icrası zamanı qadınların müxtəlif ehtiyacları və təcrübələri nəzərə alınmalı, milli, regional və yerli səviyyədə qadınların torpaq və mənzilə bərabər çıxışını təmin edən hüquqi və institusional mexanizmlər gücləndirilməlidir.

O əlavə edib ki, Azərbaycanda gender bərabərliyinin təşviqi dövlət siyasətinin əsas prioritetlərindən biridir və bu sahədə əsas hüquqi çərçivə “Gender bərabərliyinin təminatları haqqında” qanundur.

Gülnar Nazimqızı