Azərbaycan və Gürcüstan XİN başçıları Cənubi Qafqazın əhəmiyyətini müzakirə ediblər

İstanbulda keçirilən Türkiyə, Azərbaycan və Gürcüstan xarici işlər nazirlərinin 10-cu üçtərəfli görüşü çərçivəsində Azərbaycanın xarici işlər naziri Ceyhun Bayramov gürcüstanlı həmkarı Maka Boçorişvili ilə görüşüb.Bu barədə Azərbaycan Xarici İşlər Nazirliyi və Ceyhun Bayramovun "X" hesabında məlumat paylaşılıb.

Tərəflər Cənub Qaz Dəhlizi, Orta Dəhliz və digər regional bağlantı təşəbbüsləri daxil olmaqla birgə layihələrin irəlilədilməsi üzrə öhdəliklərini bir daha təsdiqləyiblər.

Nazirlər həmçinin regional və beynəlxalq proseslər ətrafında fikir mübadiləsi aparıb, Cənubi Qafqazın Avropa ilə Asiyanı birləşdirən əsas nəqliyyat və enerji dəhlizi kimi artan strateji əhəmiyyətini vurğulayıblar.

Görüşdə Azərbaycan-Gürcüstan strateji tərəfdaşlığının hazırkı vəziyyəti və perspektivləri nəzərdən keçirilib. Tərəflər sıx siyasi dialoqun, iqtisadi əməkdaşlığın, eləcə də enerji, nəqliyyat və regional bağlantı sahələrində tərəfdaşlığın əhəmiyyətini qeyd ediblər.