Litva və Azərbaycan XİN-ləri arasında siyasi məsləhətləşmələr keçirilib

Litva və Azərbaycan xarici işlər nazirlikləri arasında siyasi məsləhətləşmələr keçirilib.Bu barədə Litvanın Xarici İşlər Nazirliyi məlumat yayıb.

Vilnüsdə keçirilən məsləhətləşmələrdə Litvanın xarici işlər nazirinin müavini Audra Plepite və Azərbaycanın xarici işlər nazirinin müavini Fariz Rzayev iştirak ediblər.

Tərəflər siyasi, iqtisadi, mədəni və təhsil sahələrində əməkdaşlığın inkişaf perspektivlərini, həmçinin Azərbaycan ilə Avropa İttifaqı arasında qarşılıqlı fəaliyyəti və beynəlxalq təşkilatlar çərçivəsində əməkdaşlıq məsələlərini müzakirə ediblər.

Görüşdə Avropa və Cənubi Qafqazda geosiyasi vəziyyət, eləcə də Azərbaycanın regional proseslərdə rolu ətrafında fikir mübadiləsi aparılıb.

Litva tərəfi Azərbaycan və Ermənistan arasında sülh prosesində əldə olunan irəliləyişi alqışlayaraq, regionda uzunmüddətli sabitliyə töhfə verəcək sülh sazişinin yaxın vaxtlarda imzalanacağına ümid etdiyini bildirib.

Audra Plepite Azərbaycanın energetika sahəsində Ukraynaya göstərdiyi dəstəyi yüksək qiymətləndirib. O, Kiyevə davamlı və uzunmüddətli yardımın Ukraynanın suverenliyi və ərazi bütövlüyünün qorunması, həmçinin Avropada təhlükəsizlik və sabitliyin təmin olunması baxımından vacib olduğunu vurğulayıb.