Deputat təklif edir ki, mütaliə ilə bağlı qanun qəbul olunsun

Milli Məclisin deputatı Sahib Alıyev hesab edir ki, müasir dövrdə kitabxana və mütaliəyə ənənəvi yanaşma dəyişməli, bu sahə ölkənin milli təhlükəsizliyinin mühüm komponentlərindən biri kimi qiymətləndirilməlidir.

Kitabxana sisteminin gələcəyi ilə bağlı keçirilən müzakirələrdə çıxış edən deputat bildirib ki, dünya hazırda iqtisadi və texnoloji transformasiya prosesinin içərisindədir və bu dəyişikliklər yeni çağırışlar yaradır.


Sahib Alıyev vurğulayıb ki, kitabxanalar yalnız mütaliə məkanı kimi deyil, həm də informasiya və texnologiya mərkəzləri kimi fəaliyyət göstərməlidir.

"Xüsusilə regionlarda kitabxanalar insanların rəqəmsal xidmətlərə çıxış imkanlarını genişləndirən, elektron hökumət xidmətlərindən istifadə bacarıqlarını artıran məkanlara çevrilməlidir", -  deputat qeyd edib.

O bildirib ki, bir sıra inkişaf etmiş ölkələrdə kitabxanalar sosiallaşma və bilik mübadiləsi mərkəzi funksiyasını da yerinə yetirir və bu təcrübənin öyrənilməsi vacibdir.

Deputatın sözlərinə görə, son illər Özbəkistan və Qazaxıstanda mütaliə mədəniyyətinin inkişafı istiqamətində mühüm dövlət qərarları qəbul olunub və bu, təsadüfi deyil.

"Artıq mütaliə milli təhlükəsizlik məsələsinə çevrilib. Hesab edirəm ki, Azərbaycanda da bu sahədə ayrıca qanunvericilik təşəbbüsünə ehtiyac var. Cənubi Koreya və Birləşmiş Ərəb Əmirliklərində olduğu kimi, oxu mədəniyyətinin təşviqinə yönəlmiş sistemli yanaşma formalaşdırılmalıdır", -  Sahib Alıyev bildirib.

Deputat əlavə edib ki, bir çox ölkələrdə dövlət qurumlarında və təhsil müəssisələrində mütaliənin təşviqi üçün xüsusi mexanizmlər tətbiq olunur.

Onun fikrincə, Azərbaycanda da kitabxana işi haqqında qanunvericiliyin təkmilləşdirilməsi, eləcə də kitabxana sahəsi üzrə kadr hazırlığı sisteminin yeni dövrün tələblərinə uyğunlaşdırılması vacibdir.

Gülnar Nazimqızı