Novruz Aslanov: Kitab fondlarının qorunması milli təhlükəsizlik məsələsidir

Milli Məclisin deputatı Novruz Aslanov hesab edir ki, Azərbaycan xalqının tarixi, ədəbi və mədəni irsini özündə əks etdirən kitab fondlarının qorunması strateji əhəmiyyət daşıyır və bu istiqamətdə müasir çağırışlar nəzərə alınmalıdır. Deputat bu fikirləri kitabxana sisteminin inkişafı ilə bağlı keçirilən müzakirələr zamanı səsləndirib.

Novruz Aslanov bildirib ki, ədəbiyyat və tarixi irs xalqın yaddaşının daşıyıcısıdır və burada Azərbaycanın elmi nailiyyətləri, milli-mənəvi dəyərləri və mədəni sərvətləri toplanıb.
"Bu irs bizim strateji sərvətimizdir. Ona görə də onların qorunması məsələsinə xüsusi həssaslıqla yanaşmalıyıq", –  deputat vurğulayıb.

O qeyd edib ki, elektron kitabxanaların inkişafı dövrün tələbi olsa da, bu prosesdə süni intellekt texnologiyalarının tətbiqi, rəqəmsal platformalarla əməkdaşlıq mexanizmləri və kibertəhlükəsizlik məsələləri də diqqət mərkəzində saxlanılmalıdır.

Deputatın sözlərinə görə, qlobal miqyasda artan risklər və münaqişələr fonunda elektron məlumat bazalarının təhlükəsizliyi xüsusi əhəmiyyət kəsb edir. O bildirib ki, rəqəmsal resurslara kənar müdaxilələr, məlumatların dəyişdirilməsi və ya təhrif olunması gələcək nəsillərin düzgün informasiya əldə etməsinə mənfi təsir göstərə bilər.

Novruz Aslanov hesab edir ki, elektron sistemlərin inkişafı ilə yanaşı, ənənəvi kitab fondlarının qorunub saxlanılması da vacibdir.

Onun fikrincə, bu sahədə həyata keçirilən islahatlar milli irsin etibarlı mühafizəsini və gələcək nəsillərə olduğu kimi çatdırılmasını təmin etməlidir.

Gülnar Nazimqızı