Türkiyədə yerləşən kitabxanada Azərbaycana aid kitabların sayı çox azdır -deputat

Azərbaycana aid kitabların xaricdə təbliğinin gücləndirilməsi və kitabxana sahəsində çalışan peşəkar kadrların qorunmasının vacibdir. Bunu deputat Tənzilə Rüstəmxanlı deyib.

Deputat bildirib ki, bu yaxınlarda Türkiyəyə səfər çərçivəsində Prezident Administrasiyasının nəzdində fəaliyyət göstərən böyük kitabxanalarla tanış olub. Onun sözlərinə görə, iki milyondan artıq kitab fondu olan həmin kitabxanada Türk Dünyası bölməsi yaradılıb.

"Altı ay əvvəl həmin kitabxanada Azərbaycan bölməsində yüzdən az kitab var idi. Son səfərimiz zamanı bizə məlumat verildi ki, bu rəqəm 700-ə çatdırılıb. Lakin Azərbaycan bölməsi ilə üzbəüz yerləşən Qazaxıstan bölməsində artıq 7 mindən çox kitab təqdim olunub", -  deputat qeyd edib.

O, mədəniyyət nazirinə müraciət edərək Azərbaycan yazıçı və şairlərinin, eləcə də ölkənin tarixi və mədəniyyəti ilə bağlı nəşrlərin həmin kitabxanalara daha geniş şəkildə çatdırılmasının vacibliyini vurğulayıb.

Deputatın fikrincə, dünyanın müxtəlif ölkələrindən ziyarətçilərin gəldiyi bu cür mərkəzlər Azərbaycanın tanıdılması baxımından mühüm platformadır.

Çıxış zamanı kitabxana binalarının gələcək taleyinə də toxunan deputat istifadəyə yararsız vəziyyətə düşməməsi üçün bəzi obyektlərin təyinatının dəyişdirilməsinin mümkün variant kimi nəzərdən keçirilməsini təklif edib.

Gülnar Nazimqızı