Uşaqların hüquqlarının qorunması dövlət siyasətinin əsas prioritetlərindəndir- Nazir müavini

Uşaqların hüquqlarının müdafiəsi Azərbaycan dövlət siyasətinin əsas istiqamətlərindən biri kimi müəyyən edilib.

Bu barədə Daxili İşlər Nazirliyinin müavini İsmət Əliyev məlumat verib.

Onun sözlərinə görə, Azərbaycan Respublikasının Konstitusiyası, “Uşaq hüquqları haqqında” qanun və ölkənin qoşulduğu beynəlxalq konvensiyalar uşaqların hüquqlarının qorunması üçün möhkəm hüquqi baza yaradır.

İsmət Əliyev vurğulayıb ki, uşaqların hüquqlarının təmin olunması yalnız dövlət orqanlarının deyil, eyni zamanda ailə, təhsil müəssisələri və cəmiyyətin birgə məsuliyyətidir. Bu istiqamətdə dövlət qurumları arasında əməkdaşlıq xüsusi əhəmiyyət daşıyır.

Qeyd olunub ki, müasir dövrdə uşaqların qarşılaşdığı risklər — sosial problemlər, məişət zorakılığı, baxımsızlıq və rəqəmsal mühitdən qaynaqlanan təsirlər — kompleks yanaşma tələb edir.

Bildirilib ki, təhsil müəssisələri, valideynlər və aidiyyəti dövlət strukturları arasında əməkdaşlığın gücləndirilməsi uşaqların təhlükəsiz və sağlam inkişafı üçün vacib şərtlərdəndir.

Eyni zamanda vurğulanıb ki, uşaqların müdafiəsi təkcə inzibati tədbirlərlə məhdudlaşmamalı, maarifləndirmə, sosial dəstək və profilaktik mexanizmlərlə dəstəklənməlidir.

Çıxışda həmçinin qeyd olunub ki, uşaqların inkişafı və təhsili ilə bağlı problemlərin həlli üçün dövlət qurumları, təhsil sistemi, media və cəmiyyət arasında koordinasiyalı fəaliyyət vacibdir və bu istiqamətdə işlər davam etdirilir.

Aytac