Əli Kərimli, Ramiz Mehdiyev, Eldar Əmirov və Məmməd İbrahim barədə qərar verilib

Dövlət Təhlükəsizliyi Xidmətində (DTX) aparılan cinayət işi çərçivəsində Prezident Administrasiyasının sabiq rəhbəri Ramiz Mehdiyev, AXCP sədri Əli Kərimli, Prezident Administrasiyasının keçmiş əməkdaşı Eldar Əmirov və AXCP Rəyasət Heyətinin üzvü Məmməd İbrahim barəsində seçilmiş qətimkan tədbirlərinin müddəti uzadılıb.

"Report" xəbər verir ki, bununla bağlı qərarlar iyunun 10-da Səbail Rayon Məhkəməsində keçirilən iclaslarda qəbul edilib.

Məhkəmə Əli Kərimli və Məmməd İbrahim barəsində seçilmiş həbs qətimkan tədbirinin müddətini 5 ay uzadıb.

Həmçinin məhkəmə istintaq orqanının vəsatətini təmin edərək Ramiz Mehdiyev barəsində tətbiq edilmiş ev dustaqlığı qətimkan tədbirinin müddətini daha 5 ay artırıb.

Bundan başqa, Prezident Administrasiyasının keçmiş əməkdaşı və AMEA katibliyinin sabiq rəisi Eldar Əmirov barəsində seçilmiş həbs qətimkan tədbirinin müddəti də 5 ay uzadılıb.