Azərbaycan taxıl saxlama gücünü artıracaq

Azərbaycan hökuməti 2030-cu ilədək taxıl saxlama infrastrukturunun genişləndirilməsi, heyvandarlıq məhsulları istehsalının artırılması və aqrar emal sənayesinin inkişafı üçün yeni dəstək mexanizmləri tətbiq etməyi planlaşdırır. Bunu Aqrar Tədqiqatlar Mərkəzinin direktoru Rəşad Hüseynov Milli Məclisdə çıxışı zamanı deyib. 

Hüseynov bildirib ki, ölkədə silo anbarlarının ümumi tutumunun hazırkı 1,9 milyon tondan 2,05 milyon tona, soyuducu anbarların tutumunun isə 400 min tondan 500 min tona çatdırılması nəzərdə tutulur.

Onun sözlərinə görə, bu məqsədlə anbar avadanlıqlarının alınmasına güzəştlər və güzəştli kredit mexanizmləri tətbiq ediləcək.

Hüseynov bildirib ki, Dövlət Proqramı çərçivəsində kiçik və butik tipli şərabçılıq təsərrüfatlarının inkişafı da prioritet istiqamətlərdən biridir.

“Hazırda fəaliyyət göstərən beş butik şərabçılıq təsərrüfatının sayının 20-yə çatdırılması hədəflənir”, – o deyib.

Bu məqsədlə yeni üzüm bağlarının salınmasına və istehsal avadanlıqlarının alınmasına dövlət dəstəyinin göstərilməsi planlaşdırılır.
 

Gülnar Nazimqızı