Azərbaycan aqrar təhsildə yeni ikili diplom proqramlarını genişləndirir - rektor

Azərbaycanda aqrar təhsil və mütəxəssis hazırlığının gücləndirilməsi məqsədilə həyata keçirilən dövlət proqramı çərçivəsində yeni ikili diplom layihələri və beynəlxalq əməkdaşlıq təşəbbüsləri genişləndirilir. Bu barədə Milli Məclisdə çıxışı zamanı  Dövlət Aqrar Universitetinin rektoru Zəfər Qurbanov bildirib.

O bildirib ki, ötən tədris ilindən etibarən fəaliyyət göstərən ikili diplom proqramının ilk məzunları əmək bazarına daxil olub və onların hamısı aqrar sektorda fəaliyyət göstərir. Dövlət proqramına əsasən, 2030-cu ilədək ən azı bir ali təhsil müəssisəsi ilə yeni ikili diplom proqramlarının davam etdirilməsi planlaşdırılır.

Universitet rəhbəri qeyd edib ki, ABŞ-ın Oklahoma Universiteti ilə yeni ikili diplom proqramının gələn tədris ilindən tətbiqi istiqamətində işlər yekunlaşmaq üzrədir.

Eyni zamanda Azərbaycan Dövlət Aqrar Universiteti ilə Macarıstanın MATE Universiteti arasında yeni universitetin yaradılması və birgə təhsil proqramlarının həyata keçirilməsi nəzərdə tutulur.
 

Gülnar Nazimqızı