Nazir subsidiyalarla bağlı məsələyə münasibət bildirib

Kənd təsərrüfatında subsidiyaların təkmilləşdirilməsi fermerlərin maarifləndirilməsi, elektronlaşmanın artırılması və torpaq xəritələrinin hazırlanması ilə paralel aparılacaq.
Bunu kənd təsərrüfatı naziri Məcnun Məmmədov Milli Məclisdə çıxışı zamanı bildirib.

Nazir qeyd edib ki, əsas məqsəd məhsul subsidiyasına keçidin genişləndirilməsidir.

“Əgər əvvəllər sadəcə tütün, şəkər çuğunduru və pambığa görə məhsul subsidiyası verilirdisə, keçən ildən bura qarğıdalı və günəbaxan tumları daxil edildi. Bu ildən alma və nar məhsulları daxil edildi. Növbəti ildən artıq üzüm, xurma və digər bitkiləri nəzərdən keçiririk”, -  nazir bildirib.

Məcnun Məmmədovun sözlərinə görə, məhsul subsidiyasına keçid nəzarət və uçot mexanizmlərinin gücləndirilməsini tələb edir. O vurğulayıb ki, süni zəka, elektronlaşma və aqrar sahədə uçotun dəqiqləşməsi bu prosesi sürətləndirə bilər.

Nazir əlavə edib ki, subsidiyaların məqsədi yalnız fermerin çəkdiyi xərclərin bir hissəsini kompensasiya etmək deyil, həm də dayanıqlı aqrar fəaliyyəti təşviq etməkdir.

“Subsidiya getdikcə daha çox məhsul subsidiyası istiqamətində dəyişəcək. Qoyulan reglamentlər isə fermeri həm təşviq etməyə, həm də doğru yerdə doğru bitkini əkməyə yönəlib”, -  o bildirib.

Məcnun Məmmədov elmi-tədqiqat institutlarının fəaliyyəti ilə bağlı da danışıb. Onun sözlərinə görə, əsas məqsəd aqrar elmin iqtisadiyyatla və özəl sektorla əlaqəsinin gücləndirilməsidir.

“Hər hansı elmi araşdırma yekunda sahədə özünü göstərmirsə, bu araşdırmanın nəticəyönümlü olduğunu demək çətindir. Ana məqsəd elmi-tədqiqat institutlarında aparılan araşdırmaların özəl sektor və bizneslə əl-ələ davam etməsinə nail olmaqdır”, - nazir qeyd edib.

Gülnar Nazimqızı