“Son zəng” tədbirləri yüksək təhlükəsizlik şəraitində başa çatıb - DİN

Respublikanın bütün ümumtəhsil müəssisələrində keçirilən "Son zəng" tədbirləri zamanı ictimai asayiş və təhlükəsizlik yüksək səviyyədə təmin olunub.Bu barədə Daxili İşlər Nazirliyinin (DİN) Mətbuat Xidmətindən bildirilib.

Məlumata görə, tədbirlərlə əlaqədar əvvəlcədən hazırlanmış təhlükəsizlik planına uyğun olaraq paytaxt və regionlarda polis naryadlarının sayı artırılıb, məktəblərin ətrafında və məzunların kütləvi toplandığı ərazilərdə xidmət gücləndirilmiş rejimdə təşkil edilib.

DİN qeyd edib ki, polis əməkdaşları yol hərəkətinin təhlükəsizliyinin təmin olunması, dayanma və durma qaydalarına nəzarət, eləcə də məzunların və digər vətəndaşların rahat hərəkətinin təşkili istiqamətində tədbirlər görüblər. Həmçinin sürücülük hüququ olmayan şəxslərin nəqliyyat vasitələrini idarə etməsinin qarşısının alınması məqsədilə profilaktik nəzarət həyata keçirilib.

Nazirliyin məlumatına əsasən, görülən tədbirlər nəticəsində "Son zəng" günü keçirilən mərasimlər zamanı ictimai asayişin pozulması və digər ciddi hüquqazidd hallara yol verilməyib.

DİN ictimai təhlükəsizliyin təmin olunmasına göstərilən dəstəyə və qanunvericiliyin tələblərinə əməl olunmasına görə valideynlərə, təhsil ictimaiyyətinə və vətəndaşlara təşəkkür edib.

Nazirlik eyni zamanda məzunları "Son zəng" münasibətilə təbrik edərək onlara gələcək təhsil və peşə fəaliyyətlərində uğurlar arzulayıb.