Zakir Həsənov Pakistana başsağlığı verib

Azərbaycanın müdafiə naziri general-polkovnik Zakir Həsənov Pakistan Silahlı Qüvvələrinin Quru Qoşunlarının komandanı, Müdafiə Qüvvələrinin rəisi feldmarşal Seyid Asim Munirə başsağlığı məktubu göndərib.

Azərbaycan Müdafiə Nazirliyinin məlumatına görə, başsağlığında Pakistan Hərbi Hava Qüvvələrinə məxsus təlim təyyarəsinin Xayber-Paxtunxva əyalətində qəzaya uğraması nəticəsində iki pilotun həlak olmasından kədərləndiyi bildirilib. 

“Baş vermiş aviaqəza nəticəsində həlak olanlara rəhmət diləyir, onların yaxınlarının dərdlərinə şərik olur və ailələrinə dərin hüznlə başsağlığı verirəm”, - məktubda deyilir.

Pakistan Hərbi Hava Qüvvələrinə məxsus təlim təyyarəsi iyunun 15-də Mərdan şəhəri yaxınlığında rutin təlim uçuşu zamanı qəzaya uğrayıb. Hadisə nəticəsində təyyarədə olan hər iki pilot həlak olub.