Azərbaycan BMT-nin İnsan Hüquqları Komitəsinə üzv seçilib

Nyu-Yorkda keçirilən seçkilərdə Azərbaycanın namizədi, beynəlxalq hüquq professoru Fuad Zərbiyev BMT-nin İnsan Hüquqları Komitəsinin (ICCPR) 2027–2030-cu illər üzrə üzvlüyünə seçilib. Bu barədə Azərbaycan Xarici İşlər Nazirliyi məlumat yayıb. 

XİN-in məlumatına görə, Mülki və Siyasi Hüquqlar haqqında Beynəlxalq Pakta tərəf dövlətlərin 42-ci iclası çərçivəsində keçirilən səsvermədə 16 ölkədən namizədlər Komitədəki doqquz vakant yer uğrunda mübarizə aparıblar.

Nazirlik bildirib ki, Fuad Zərbiyev səsvermənin ilk mərhələsində 131 dövlətin dəstəyini qazanaraq ən çox səs toplayan namizəd olub.

BMT-nin İnsan Hüquqları Komitəsi Mülki və Siyasi Hüquqlar haqqında Beynəlxalq Paktın icrasına nəzarət edən və 18 müstəqil ekspertdən ibarət qurumdur. Komitə Pakta tərəf dövlətlərin öhdəliklərinin yerinə yetirilməsini qiymətləndirir və beynəlxalq insan hüquqları hüququnun tətbiqini izləyir.