Məktəblərdə müəllimlərin geyimi qanunla tənzimlənəcək

Azərbaycanda dövlət məktəblərində müəllimlərin geyimi ilə bağlı hüquqi əsas yaradılır.
Bu, Milli Məclisin Elm və təhsil komitəsinin bu gün müzakirəyə çıxardığı “Ümumi təhsil haqqında” qanuna dəyişiklik layihəsində nəzərdə tutulur.
Layihəyə əsasən, dövlət ümumi təhsil müəssisələrində müəllimlərin müəyyən edilmiş geyim tələblərinə riayət etməsi qanunvericilikdə təsbit olunacaq.
Dəyişikliyin məqsədi məktəblərdə peşəkar iş mühitini gücləndirmək, nizam-intizamı artırmaq və vahid yanaşma formalaşdırmaqdır.

Qanun layihəsində qeyd olunur ki, müəllim şagirdlər üçün təkcə bilik verən şəxs deyil, həm də davranışı, ünsiyyət mədəniyyəti və görünüşü ilə nümunədir.

Bu baxımdan müəllimlərin səliqəli, sadə və işgüzar geyimdə olması onların peşəkar statusunu və məsuliyyətini daha aydın göstərən amil kimi qiymətləndirilir.

Layihəyə görə, müəllimlərin geyimi gündəlik iş şəraitinə uyğun, rahat və praktik olmalı, eyni zamanda məktəbin peşəkar mühitini əks etdirməlidir.

Dəyişikliyin məktəblərdə təşkilati mədəniyyətin inkişafına, valideynlərin təhsil müəssisələrinə etimadının artmasına və daha nizamlı təhsil mühitinin formalaşmasına xidmət edəcəyi bildirilir.

Gülnar Nazimqızı