Rusiya 103 Kanada vətəndaşına ölkəyə girişi qadağan edir

Rusiya Kanada tərəfindən tətbiq edilmiş sanksiyalara cavab olaraq bu ölkənin 103 vətəndaşının, o cümlədən nazirlər və parlament üzvlərinin ölkəyə girişinə daimi qadağa qoyub.Bu barədə Rusiya Xarici İşlər Nazirliyi məlumat yayıb.

Nazirliyin bəyanatında bildirilir ki, qərar Kanada hökumətinin Rusiyaya qarşı sanksiyalarına cavab tədbiri kimi qəbul edilib. Qadağa siyahısına Rusiyanın daxili və xarici siyasətini tənqid edən, həmçinin Rusiya dövlət aktivlərinin müsadirəsini dəstəkləyən şəxslər daxil edilib.

Siyahıda Kanada Senatının 19 üzvü, həmçinin Nazirlər Kabinetində təmsil olunan İcmalar Palatasının 11 üzvü yer alıb. Onların arasında energetika və təbii sərvətlər naziri Tim Hocson, məşğulluq və ailə məsələləri naziri Petti Haydu, Kanada Silahlı Qüvvələrinin müdafiə qərargahının rəisi Cenni Karinyan, Kanadanın Rusiyadakı və Ukraynadakı keçmiş səfiri Kris Uestdal, eləcə də "United Nations Watch" təşkilatının rəhbəri Hillel Neuer var.

Bəyanata görə, məhdudiyyətlər həmçinin beş dövlət katibini, beş parlament katibini və 60 deputatı da əhatə edir.

Kanada daha əvvəl yeddi fiziki şəxsi və 34 hüquqi şəxsi Rusiyaya qarşı sanksiyalar siyahısına daxil etmişdi.