Psixiatrik məlumatların elektron kartda saxlanılması təklif edilir

Azərbaycanda “Psixiatriya yardımı haqqında” qanuna dəyişiklik layihəsinə əsasən, şəxsin psixi sağlamlığının vəziyyəti və ona göstərilən psixiatriya yardımı barədə məlumatların elektron sağlamlıq kartı sistemində saxlanılması təklif olunur.

Layihəyə görə, psixi pozuntusu olan şəxsin sağlamlıq vəziyyəti və ona göstərilən psixiatriya yardımı tədbirləri barədə məlumatlar konfidensial hesab edilir. Bu məlumatlardan sərbəst istifadə hüququ yalnız həmin şəxsin özünə və qanunvericiliklə nəzərdə tutulmuş qaydada icazə verilmiş şəxslərə məxsus olacaq.

Qanuna təklif olunan digər dəyişikliyə əsasən, psixiatriya yardımı alan və ya əvvəllər belə yardım almış şəxsə göstərilən yardım tədbirləri barədə məlumatlar onun yazılı müraciətindən sonra iki iş günü ərzində müəssisənin müdiriyyəti tərəfindən elektron sağlamlıq kartı sistemindən əldə ediləcək.

Həmin şəxsin qanuni nümayəndəsinə və ya qanuni nümayəndəsi olan şəxs barədə məlumatlar isə yazılı müraciətdən sonra iki iş günü ərzində müdiriyyət tərəfindən təqdim olunacaq.

Mövcud qanunvericilikdə bu məlumatların şəxsin özünə və ya qanuni nümayəndəsinə yazılı müraciətdən sonra iki gün ərzində təqdim olunması nəzərdə tutulur. Təklif olunan dəyişikliklər məlumatların təqdim edilməsi mexanizmini elektron sağlamlıq kartı sistemi ilə əlaqələndirir.

Gülnar Nazimqızı