Psixiatriya qanunu müasir diaqnostika və müalicəyə uyğunlaşdırılır - deputat

Psixiatriya daim inkişaf edən tibb sahəsidir və yeni diaqnostika üsulları, innovativ texnologiyalar, eləcə də müasir müalicə metodlarının tətbiqi mövcud qanunvericiliyin yenilənməsini zəruri edir. Bunu deputat Əhliman Əmiraslanov deyib. 

“Psixiatriya yardımı haqqında vaxtilə qəbul edilmiş qanuna dəyişiklik etmək məcburiyyətində qalırıq. Çünki əhaliyə göstərilən psixiatriya yardımı, bu xəstələrin müalicəsi və diaqnostikası bir neçə il əvvəlki səviyyədə deyil”, - Əmiraslanov vurğulayıb.

Onun sözlərinə görə, əvvəllər psixi xəstəliklərin diaqnostikasında əsasən subyektiv qiymətləndirmələrdən istifadə olunurdusa, hazırda daha dəqiq və obyektiv müayinə imkanları mövcuddur.

Deputat bildirib ki, müasir diaqnostika metodlarına elektroensefaloqrafiya ilə yanaşı kompüter tomoqrafiyası, kontrastlı maqnit-rezonans tomoqrafiyası, PET-CT müayinələri, müxtəlif izotoplardan istifadə edilən topik müayinələr, laborator və genetik analizlər daxildir.

Əmiraslanov əlavə edib ki, biomarkerlər də psixi xəstəliklərin diaqnostikasında getdikcə daha geniş tətbiq olunur və diaqnozun dəqiqləşdirilməsində mühüm rol oynayır.

“Bu xəstələrin müalicəsində klassik dərman preparatları ilə yanaşı, digər müasir müalicə üsulları da tətbiq olunur. Onlardan biri kranial maqnitoterapiyadır. Müasir texnologiyalar vasitəsilə beynin müəyyən nahiyələrinə təsir etməklə ayrı-ayrı sindrom və əlamətləri aradan qaldırmaq mümkündür”, o qeyd edib.

Deputatın sözlərinə görə, psixiatriya elminin inkişafı qanunvericiliyin də müasir tibbi yanaşmalara uyğunlaşdırılmasını tələb edir.

Gülnar Nazimqızı