Deputat psixiatriya sahəsində kadr çatışmazlığı ilə bağlı dinləmələrin keçirilməsini təklif edib

Milli Məclisdə “Psixiatriya yardımı haqqında” qanun layihəsinin müzakirəsi zamanı deputat Məlahət İbrahimqızı psixiatriya sahəsində kadr çatışmazlığı probleminə diqqət çəkib və bu mövzuda parlamentdə ayrıca dinləmələrin keçirilməsini təklif edib.

“Bu gün ölkəmizdə bəzi sahələrdə olduğu kimi, psixiatriya sahəsində də kritik səviyyədə kadr çatışmazlığı mövcuddur. Xüsusilə regionlarda psixiatr mütəxəssislərə ciddi ehtiyac var”, - deputat vurğulayıb.

Məlahət İbrahimqızı qeyd edib ki, dünyada olduğu kimi Azərbaycanda da psixi sağlamlıqla bağlı problemlərin artması müşahidə olunur. Bu səbəbdən sahə üzrə milli kadr potensialının gücləndirilməsi və yeni mütəxəssislərin hazırlanması xüsusi diqqət tələb edir.

Deputat Milli Məclisin aidiyyəti komitəsində psixiatriya sahəsində insan resursları və kadr hazırlığı ilə bağlı ayrıca müzakirələrin və ya dinləmələrin təşkil edilməsinin məqsədəuyğun olacağını bildirib.

Gülnar Nazimqızı