Azərbaycanda kənd təsərrüfatı istehsalı 2,3% artıb

Azərbaycanda 2026-cı ilin yanvar-mayında 3,996 milyard manat dəyərində kənd təsərrüfatı məhsulu istehsal olunub ki, bu da ötən ilin eyni dövrü ilə müqayisədə real ifadədə 2,3% çoxdur. Bu barədə Dövlət Statistika Komitəsindən bildirilib. 

Hesabat dövründə heyvandarlıq məhsullarının istehsalı 2,6%, bitkiçilik məhsullarının istehsalı isə 1,1% artıb.

Məhsul yığımına başlanılması ilə əlaqədar iyunun 1-nə olan vəziyyətə görə tarlalardan 443,6 min ton tərəvəz yığılıb ki, bu da ötən ilin eyni dövrü ilə müqayisədə 1,5% çoxdur. Kartof yığımı 168,9 min ton təşkil edib və illik müqayisədə 0,1% artıb.

Meyvə və giləmeyvə istehsalında daha yüksək artım qeydə alınıb. Belə ki, bu məhsulların yığımı 54 min tona çataraq ötən ilin eyni dövrü ilə müqayisədə 55,4% artıb.

Eyni zamanda, dənli və dənli paxlalı bitkilərin yığımı 30,6 min ton olub ki, bu da illik müqayisədə 69,1% azdır. Yaşıl çay yarpağı istehsalı isə 11,5% artaraq 556 tona yüksəlib.

Gülnar Nazimqızı