İİB prezidenti: Regionun gələcəyi inteqrasiyadan keçir

Mərkəzi Asiya və Qafqaz ölkələri müstəqillik əldə etdikdən sonra müxtəlif coğrafi və siyasi maneələrlə qarşılaşsalar da, regional inteqrasiyanın inkişaf və rifah üçün ən səmərəli mexanizm olduğunu dərk ediblər.

Bu fikirləri İslam İnkişaf Bankı (IsDB) Qrupunun prezidenti Məhəmməd Əl-Casir Bakıda keçirilən IsDB Qrupunun 2026-cı il İllik Toplantısı çərçivəsində səsləndirib.

Onun sözlərinə görə, region ölkələri arasında əməkdaşlığın genişlənməsi xüsusilə hidroenerji layihələrinin inkişafına təkan verir. Bu isə su və enerji ehtiyatlarından daha səmərəli istifadə olunmasına, eyni zamanda iqtisadi artımın sürətlənməsinə imkan yaradır.

Məhəmməd Əl-Casir vurğulayıb ki, inteqrasiya parçalanma ilə müqayisədə daha dayanıqlı və effektiv inkişaf modelidir. O qeyd edib ki, regional və beynəlxalq əməkdaşlıq platformaları vasitəsilə rifahın daha geniş coğrafiyada yayılmasına nail olmaq mümkündür.

İİB prezidenti bildirib ki, tədbirin əsas mövzusu Azərbaycanın həyata keçirdiyi inkişaf strategiyası ilə üst-üstə düşür. O əlavə edib ki, oxşar inteqrasiya prosesləri yalnız Mərkəzi Asiya və Qafqazda deyil, həmçinin Qərbi, Şərqi və Şimali Afrika ölkələrində, eləcə də Yaxın Şərqdə müşahidə olunur. IsDB isə bu istiqamətdə həyata keçirilən təşəbbüslərə dəstək verməyə davam edir.