İİB rəhbəri: İnkişaf üçün ölkələr arasında inteqrasiya və təcrübə mübadiləsi vacibdir

İslam İnkişaf Bankı (İİB) Qrupunun sədri Məhəmməd Əl-Cəssir bildirib ki, Bank üzv ölkələrə hazır inkişaf modelləri təqdim etmək əvəzinə, onların ehtiyaclarına uyğun həllərin hazırlanmasına və təcrübə mübadiləsinə üstünlük verir.

O, İİB Qrupunun 14-cü Özəl Sektor Forumunda çıxışı zamanı qeyd edib ki, qurum ölkələrlə tərəfdaşlıq əsasında işləyir və müxtəlif regionlarda əldə olunan uğurlu təcrübələrin paylaşılmasını təşviq edir.

Əl-Cəssirin sözlərinə görə, regional əməkdaşlıq və inteqrasiya iqtisadi inkişafın əsas hərəkətverici qüvvələrindəndir. O vurğulayıb ki, ölkələr öz üstünlüklərini bölüşməli, birgə layihələr həyata keçirməli və əldə olunan faydaları qarşılıqlı şəkildə paylaşmalıdır.

İİB rəhbəri əlavə edib ki, davamlı inkişaf yalnız iqtisadi göstəricilərlə məhdudlaşmır, sosial rifahın və infrastrukturun inkişafını da əhatə edir. Onun fikrincə, rifahın geniş təbəqələr arasında bölüşdürülməsi dayanıqlı inkişafın əsas şərtlərindən biridir.

Məhəmməd Əl-Cəssir qeyd edib ki, İİB üzv dövlətlər arasında əməkdaşlığın gücləndirilməsi, birgə layihələrin maliyyələşdirilməsi və inteqrasiya proseslərinin dəstəklənməsində fəal rol oynamaqda davam edir.

Aytac