Əliyev Belarusun Müstəqillik Günü münasibətilə Lukaşenkonu təbrik edib

Azərbaycan Prezidenti İlham Əliyev Belarus Prezidenti Aleksandr Lukaşenkoya ölkəsinin Müstəqillik Günü münasibətilə təbrik məktubu göndərib.

Prezidentin Mətbuat Xidmətinin yaydığı məlumata görə, İlham Əliyev məktubunda Azərbaycan ilə Belarus arasında münasibətlərin yüksək səviyyədə qarşılıqlı anlaşma və sıx əməkdaşlıqla xarakterizə olunduğunu bildirib.

Dövlət başçısı qeyd edib ki, xalqlar arasında mövcud dostluq və qarşılıqlı dəstək ənənələri, eləcə də yüksək səviyyədə əldə olunmuş razılaşmaların icrası ikitərəfli münasibətləri yeni məzmunla zənginləşdirir və əməkdaşlığın bütün istiqamətlər üzrə genişlənməsinə töhfə verir.

İlham Əliyev Azərbaycan ilə Belarus arasında çoxşaxəli əməkdaşlığın və strateji tərəfdaşlığın bundan sonra da birgə səylərlə inkişaf edəcəyinə əminliyini ifadə edib.

Prezident məktubunda Aleksandr Lukaşenkoya möhkəm cansağlığı, fəaliyyətində uğurlar, Belarus xalqına isə sülh və firavanlıq arzulayıb.

Azərbaycan və Belarus siyasi, iqtisadi, sənaye və hərbi-texniki sahələrdə əməkdaşlıq edən strateji tərəfdaş ölkələrdir. İki ölkə arasında münasibətlər son illərdə qarşılıqlı yüksək səviyyəli səfərlər və birgə layihələr fonunda inkişaf edib.