Hacıyev Ceffri Saksla dayanıqlı inkişaf və geoiqtisadiyyatı müzakirə edib

Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev dünyaşöhrətli iqtisadçı, Kolumbiya Universitetinin Dayanıqlı İnkişaf Mərkəzinin direktoru Ceffri Saksla Bakıda görüş keçirib.

Hikmət Hacıyev "X" sosial şəbəkəsində paylaşdığı məlumata görə, tərəflər dayanıqlı inkişaf, geosiyasət və geoiqtisadiyyat, daha geniş Xəzər regionu konsepsiyası, Azərbaycanın orta güc (middle power) kimi artan rolu, ölkənin sülh gündəliyi və regional sahiblik prinsipinin əhəmiyyəti ətrafında fikir mübadiləsi aparıblar.

Prezidentin köməkçisi bildirib ki, görüşdə Ceffri Saksın Şərq-Qərb marşrutu boyunca elektromobillərlə səyahəti nəzərdə tutan "Marco Polo – Drive of Peace" təşəbbüsü də müzakirə edilib. Onun sözlərinə görə, bu təşəbbüs dialoq və qarşılıqlı bağlılığın təşviqi baxımından ilhamverici nümunədir.

Ceffri Saks dayanıqlı inkişaf, qlobal iqtisadiyyat və beynəlxalq siyasət sahəsində tanınmış amerikalı iqtisadçıdır. O, hazırda Kolumbiya Universitetinin Dayanıqlı İnkişaf Mərkəzinə rəhbərlik edir və BMT-nin dayanıqlı inkişaf məqsədləri üzrə beynəlxalq təşəbbüslərdə fəal iştirak edir.