Sahibə Qafarova Xameneinin vida mərasimində iştirak edib

Milli Məclisin sədri Sahibə Qafarovanın rəhbərlik etdiyi Azərbaycan nümayəndə heyəti iyulun 3-də Tehranda İranın sabiq Ali Rəhbəri Ayətullah Seyid Əli Xameneinin vida mərasimində iştirak edib. Bu barədə Milli Məclisin Mətbuat və ictimaiyyətlə əlaqələr şöbəsi məlumat yayıb.

Məlumata görə, nümayəndə heyətini Tehranın Mehrabad Beynəlxalq Hava Limanında İran İslam Şurası Məclisi sədrinin müavini Əli Nikzad, Azərbaycanın İrandakı səfiri Əli Əlizadə və protokol əməkdaşları qarşılayıblar.

Azərbaycan nümayəndə heyəti daha sonra Tehranın Mosallah kompleksində keçirilən vida mərasiminə qatılıb.

Mərasim çərçivəsində Sahibə Qafarova İran Prezidenti Məsud Pezeşkian, İran İslam Şurası Məclisinin sədri Məhəmməd Baqer Qalibaf və digər rəsmilərlə görüşərək Azərbaycan Prezidenti İlham Əliyevin adından başsağlığı verib, Azərbaycan xalqının hüzn və ehtiramını İran xalqına çatdırıb.

Nümayəndə heyətinin tərkibinə Baş nazirin müavini Şahin Mustafayev, Milli Məclis sədrinin müavini Ziyafət Əsgərov, xarici işlər nazirinin müavini Samir Şərifov, Naxçıvan Muxtar Respublikasının Baş naziri Cabbar Musayev və digər rəsmilər daxildir.