Azərbaycan AŞPA ilə münaqişə səbəbindən Avropa Şurasından çıxmağı nəzərdən keçirib

Azərbaycan Parlament Assambleyasında (AŞPA) nümayəndə heyətinin səsvermə hüququndan məhrum edilməsindən sonra Avropa Şurasından tam çıxmaq imkanını ciddi şəkildə nəzərdən keçirib. Bunu Prezident İlham Əliyev bildirib.

Onun sözlərinə görə, AŞPA-nın qərarı insan hüquqları məsələləri ilə bağlı olmayıb, əksinə, Bakının fikrincə, Azərbaycanın ərazi bütövlüyünü və suverenliyini bərpa etməsinə görə verilən cəza olub.

Əliyev bildirib ki, Avropa Şurasının Baş katibi Alen Berse Azərbaycanın təşkilatı tərk etməməsini xahiş etdikdən və münasibətlərin yaxşılaşdırılması üçün çıxış yolu tapmağı təklif etdikdən sonra Bakı bu məsələni təxirə salıb.

Lakin prezidentin sözlərinə görə, o vaxtdan bəri heç bir irəliləyiş əldə olunmayıb və AŞPA Azərbaycanın qəbul edə bilməyəcəyi tələbləri irəli sürməkdə davam edir.

Əliyev bildirib ki, Azərbaycan nümayəndə heyəti yalnız səsvermə hüququ tam bərpa edildikdən sonra AŞPA-ya qayıdacaq.

Prezident həmçinin deyib ki, Azərbaycan nümayəndə heyətinin iştirakı olmadan seçilmiş Avropa İnsan Hüquqları Məhkəməsinin hakimlərinin qərarlarını tanımır. Onun sözlərinə görə, Azərbaycan AŞPA-da səsvermə hüququndan məhrum edildiyi üçün həmin hakimlərin seçilməsində iştirak etməyib.

N.Təbrizli