Bakıda 200 min manatlıq soyğunçuluq edənlər tutulub

Bakının Nəsimi rayonunda 200 min manatın ələ keçirilməsi ilə nəticələnən soyğunçuluq hadisəsini törətməkdə şübhəli bilinən dörd nəfər saxlanılıb.

Daxili İşlər Nazirliyinin məlumatına görə, Nəsimi Rayon Polis İdarəsinin əməkdaşlarının keçirdikləri əməliyyat tədbirləri nəticəsində əvvəllər məhkum olunmuş Elxan Alxanov, Əşrəf Alxanlı, Musa Məmiyev və Bəxtiyar Xudiyev tutulublar.

İstintaqla müəyyən edilib ki, zərərçəkmiş şəxslə birlikdə banklardan birinə gedən Bəxtiyar Xudiyev onun üzərində külli miqdarda pul olduğunu digər dəstə üzvlərinə məlumat verib. Bundan sonra şübhəlilər zərərçəkmişə yaxınlaşaraq içərisində 200 min manat olan çantanı ələ keçirib hadisə yerindən qaçıblar.

Faktla bağlı cinayət işi başlanılıb, araşdırma davam etdirilir.