FHN-dən həftəsonu üçün xəbərdarlıq: temperatur 41 dərəcəyə çatacaq

Fövqəladə Hallar Nazirliyi (FHN) həftəsonu gözlənilən isti hava şəraiti ilə əlaqədar əhaliyə yanğın təhlükəsizliyi qaydalarına ciddi əməl etməyə çağırıb.

Nazirliyin məlumatına görə, Milli Hidrometeorologiya Xidmətinin proqnozuna əsasən, qarşıdan gələn şənbə və bazar günləri ölkə ərazisində havanın temperaturu yüksələcək, bəzi yerlərdə 41 dərəcəyədək isti müşahidə olunacaq.

FHN bildirib ki, yüksək temperatur açıq ərazilərdə, xüsusilə meşə massivləri və əkin sahələrində yanğın riskini artırır. Eyni zamanda, kondisioner və digər elektrik cihazlarından istifadənin çoxalması elektrik şəbəkəsinin yüklənməsinə və qısaqapanma nəticəsində yanğınların baş verməsinə səbəb ola bilər.

Nazirlik vətəndaşlara evlərdə və iş yerlərində elektrik şəbəkəsini həddindən artıq yükləməməyi, elektrik avadanlıqlarının texniki vəziyyətini yoxlamağı, aşkar olunan nasazlıqları vaxtında aradan qaldırmağı tövsiyə edib.

Bundan başqa, əkin sahələrində, xırmanlarda, ot tayaları olan ərazilərdə açıq oddan istifadə edilməməsi, siqaret çəkilməməsi, yaşayış və təsərrüfat sahələrinin quru ot və tullantılardan təmizlənməsi tövsiyə olunub.

FHN meşəlik ərazilərdə istirahət edən vətəndaşlara da müraciət edərək tonqalın yalnız xüsusi ayrılmış yerlərdə qalanmasını, ətrafının quru ot və yanar materiallardan təmizlənməsini, tonqalın nəzarətsiz buraxılmamasını və ərazi tərk olunarkən tam söndürülməsini xatırladıb. Nazirlik küləkli havada tonqal qalanmasının qadağan olunduğunu da vurğulayıb.