BDYPİ sürücülərə isti hava ilə bağlı xəbərdarlıq edib

Baş Dövlət Yol Polisi İdarəsi (BDYPİ) iyulun 25-29-da ölkə ərazisində gözlənilən isti hava şəraiti ilə əlaqədar sürücüləri diqqətli olmağa və səhhətlərini, eləcə də nəqliyyat vasitələrinin texniki vəziyyətini nəzərə alaraq hərəkət etməyə çağırıb.

BDYPİ-dən bildirilib ki, yüksək temperatur sürücülərdə diqqətin azalmasına, tez yorulmaya, reaksiya müddətinin uzanmasına və səhhətdə qəfil narahatlıqların yaranmasına səbəb ola bilər. Bu amillər yol-nəqliyyat hadisələrinin başvermə riskini artırır.

İdarə xüsusilə yaşlı sürücülərə, ürək-damar, arterial təzyiq, şəkərli diabet və digər xroniki xəstəlikləri olan şəxslərə günün ən isti saatlarında zərurət olmadıqda səfərə çıxmamağı tövsiyə edib.

Digər sürücülərə isə avtomobillərin texniki sazlığını, xüsusilə soyutma və əyləc sistemlərini, təkərləri və kondisioneri əvvəlcədən yoxlamaq, uzun səfərlər zamanı mütəmadi fasilələr vermək, halsızlıq, başgicəllənmə və ya yuxululuq hiss etdikdə hərəkəti dayandırmaq, sürət həddinə riayət etmək, riskli manevrlərdən çəkinmək, azyaşlı uşaqları avtomobildə nəzarətsiz saxlamamaq və günəş altında qalmış nəqliyyat vasitəsini hərəkətə başlamazdan əvvəl havalandırmaq tövsiyə olunub.

BDYPİ sürücüləri səfərlərini imkan daxilində günün daha sərin saatlarına planlaşdırmağa, yol hərəkəti qaydalarına əməl etməyə və özlərinin, eləcə də digər hərəkət iştirakçılarının həyatını təhlükə altına sala biləcək davranışlardan çəkinməyə çağırıb.