Hacıqabulda sərnişin qatarının vurduğu piyada ölüb

Hacıqabul rayonunda Atbulaq-Pirsaat sahəsində hərəkətdə olan sərnişin qatarının vurduğu piyada ölüb. Bu barədə "Azərbaycan Dəmir Yolları" (ADY) məlumat yayıb.

Məlumata görə, hadisə bu gecə baş verib. Bildirilib ki, naməlum kişi qəflətən qatarın qarşısına çıxıb. Maşinist təcili əyləcləmə tətbiq etsə də, məsafə kifayət etmədiyindən toqquşmanın qarşısını almaq mümkün olmayıb və piyada hadisə yerində ölüb.

ADY bir daha vətəndaşlara çağırış edərək onları dəmir yolu xətlərini yalnız müəyyən edilmiş yer və piyada keçidlərindən keçməyə, həyatlarını riskə atacaq hərəkətlərdən çəkinməyə çağırıb.

Hadisə ilə bağlı araşdırma aparılır.