Bakı və Abşeronun bir sıra qəsəbələrində iki gün su kəsiləcək

Bakı şəhəri və Abşeron rayonunun bir sıra qəsəbələrində iyulun 28-dən 30-dək içməli suyun verilişində müvəqqəti fasilə yaranacaq.

Azərbaycan Dövlət Su Ehtiyatları Agentliyinə məxsus "İri Şəhərlərin Su Təchizatı" QSC-nin məlumatına görə, fasilə istismar müddəti başa çatmış qəzalı su xəttinin bir hissəsinin yenisi ilə əvəz olunması məqsədilə aparılan təmir işləri ilə əlaqədardır.

Su təchizatında fasilə Abşeron rayonunun Saray, Ceyranbatan, Mehdiabad, Fatmayı və Goradil qəsəbələrini, Corat bağ massivini, həmçinin Bakının Sabunçu rayonunun Kürdəxanı, Pirşağı, Ramana, Maştağa, Bilgəh və Nardaran qəsəbələrinin bəzi ərazilərini əhatə edəcək.

Qurumun bildirdiyinə görə, təmir işləri iyulun 28-i səhər saatlarından başlayacaq və iyulun 30-u günorta saatlarınadək davam edəcək.