ASCO-nun sərnişin daşımaları ilk yarımildə 3,4 % artıb

Bu ilin yanvar–iyununda "Azərbaycan Xəzər Dəniz Gəmiçiliyi" QSC (ASCO) 13 219 sərnişin daşıyıb ki, bu da ötən ilin eyni dövrü ilə müqayisədə 3,4 % çoxdur.

ASCO-nun yaydığı məlumata görə, 2025-ci ilin ilk yarısında bu göstərici 12 783 nəfər təşkil edib.

Hesabat dövründə ən yüksək sərnişin daşınması iyun ayında qeydə alınıb. Həmin ay 2 944 nəfər daşınıb. Bu isə ötən ilin eyni ayı ilə müqayisədə 25,6 % artım deməkdir.

İlin ilk altı ayında Ələt–Kurık və Kurık–Ələt marşrutları üzrə ümumilikdə 8 497 sərnişin daşınıb. Onlardan 4 658 nəfəri Ələt–Kurık, 3 839 nəfəri isə Kurık–Ələt istiqamətində səfər edib.

Eyni dövrdə Ələt–Türkmənbaşı və Türkmənbaşı–Ələt marşrutları üzrə isə 4 722 sərnişin daşınıb. Bu marşrut üzrə 2 692 nəfər Ələt–Türkmənbaşı, 2 030 nəfər isə Türkmənbaşı–Ələt istiqamətində səyahət edib.

ASCO Xəzər dənizi üzərindən Azərbaycanı Qazaxıstanın Kurık və Türkmənistanın Türkmənbaşı limanları ilə birləşdirən bərə və sərnişin daşımalarını həyata keçirir. Bu marşrutlar Transxəzər Beynəlxalq Nəqliyyat Marşrutunun (Orta Dəhliz) tərkib hissəsi olmaqla yanaşı, sərnişin və yük daşımalarında mühüm rol oynayır.