Magistraturaya qəbul olunanlar avqustun 3-dən qeydiyyatdan keçə biləcəklər – DİM

Azərbaycanın ali təhsil müəssisələrinin magistratura səviyyəsinə əsas yerləşdirmənin nəticələrinə əsasən qəbul olunan bakalavrlar avqustun 3-dən 12-dək elektron qeydiyyatdan keçməlidirlər. Bu barədə Dövlət İmtahan Mərkəzinin (DİM) sədri Məleykə Abbaszadə cümə günü jurnalistlərə bildirib.

Onun sözlərinə görə, qəbul olunanlar 3 avqust saat 15:00-dan 12 avqust saat 18:00-dək elektron qaydada qeydiyyatdan keçə bilərlər. Boş qalan plan yerlərinə əlavə yerləşdirmənin vaxtı isə daha sonra DİM tərəfindən elan olunacaq.

DİM-in məlumatına görə, magistraturaya ixtisaslaşma seçimində iştirak edən 15 721 bakalavrdan 13 845-i qəbul olunub. Onlardan 6 580 nəfər dövlət sifarişi, 52 nəfər dövlət hesabına, 7 213 nəfər isə ödənişli əsaslarla təhsil alacaq.

Qəbul olunanların 10 510-u cari ilin, 3 335-i isə əvvəlki illərin məzunlarıdır. Ötən illə müqayisədə ixtisaslaşma seçimində iştirak edənlərin sayı 166, qəbul olunanların sayı isə 399 nəfər artıb. Ödənişsiz əsaslarla təhsil almaq hüququ qazananların sayı da 834 nəfər çox olub.
Bu il magistratura üzrə ayrılmış 17 658 plan yerinin 13 845-i dolub ki, bu da ümumi planın 78,41%-ni təşkil edir. 3 813 yer vakant qalıb. DİM bildirib ki, plan yerlərinin bir hissəsinin boş qalacağı əvvəlcədən gözlənilən idi, çünki ixtisaslaşma seçimində iştirak edən bakalavrların sayı ayrılmış yerlərdən az olub.

Qəbul 67 ixtisaslaşma proqramı üzrə aparılıb. Maşın mühəndisliyi, nəqliyyat mühəndisliyi, su bioehtiyatları və akvakultura, balıqçılıq, əczaçılıq, nəqliyyatda servis, aerokosmik mühəndislik və yanğın təhlükəsizliyi mühəndisliyi proqramlarında bütün plan yerləri dolub.
Bununla yanaşı, mədən mühəndisliyi, tərcümə, kitabxanaçılıq, regionşünaslıq, hava nəqliyyatı, səhiyyə, biotexnologiya və incəsənət istiqamətlərində plan yerlərinin yarıdan çoxu boş qalıb.
Ali təhsil müəssisələri arasında Dövlət Gömrük Komitəsinin Akademiyası və Fövqəladə Hallar Nazirliyinin Akademiyasında plan yerləri tam dolub. Prezident yanında Dövlət İdarəçilik Akademiyası, Azərbaycan Dövlət İqtisad Universiteti, Bakı Ali Neft Məktəbi, Azərbaycan Texniki Universiteti və Milli Aviasiya Akademiyasında isə doluluq səviyyəsi 90%-i ötüb.