Paşinyan yenidən baş nazir olmaq üçün namizədliyini irəli sürüb

Ermənistanda hakim "Vətəndaş Müqaviləsi" Partiyası Baş nazir vəzifəsinə Nikol Paşinyanın namizədliyini rəsmi olaraq Respublika Prezidentinə təqdim edib.

Partiyanın yaydığı məlumata görə, parlament çoxluğunu təşkil edən siyasi qüvvə Ermənistan Konstitusiyasının 149-cu maddəsinə uyğun olaraq Paşinyanın baş nazir təyin olunması prosedurunun həyata keçirilməsi üçün zəruri sənədlər paketini dövlət başçısına təqdim edib.

Ermənistan Konstitusiyasına əsasən, yeni seçilmiş Milli Məclisin ilk iclası günü hökumət istefa verir və yeni hökumət formalaşdırılanadək səlahiyyətlərini icra edən statusunda fəaliyyətini davam etdirir. Parlamentdə çoxluğa malik siyasi qüvvənin irəli sürdüyü namizəd Respublika Prezidenti tərəfindən baş nazir təyin edilir. Yeni seçilmiş parlamentin ilk iclasında hökumət istefa verib və Nikol Paşinyan müvəqqəti olaraq baş nazir səlahiyyətlərini icra etməyə davam edir.