Təhsil Tələbə Krediti Fonduna payız semestri üzrə müraciətlər avqustun 3-də başlayacaq

Təhsil Tələbə Krediti Fondu (TTKF) 2026–2027-ci tədris ilinin payız semestri üzrə təhsil tələbə kreditləri üçün müraciətlərin avqustun 3-dən etibarən qəbuluna başlayacaq.

Fondun məlumatına görə, müraciətlər e-ttkf.edu.az portalı vasitəsilə qəbul ediləcək.

Müraciət hüququ 2026–2027-ci tədris ili üzrə magistratura səviyyəsinə yeni qəbul olunmuş tələbələrə, eləcə də ali, orta ixtisas və peşə təhsili müəssisələrinin ikinci və daha yuxarı kurslarında təhsil alan tələbələrə şamil edilir. Bakalavriat səviyyəsinə yeni qəbul olunanlar isə ixtisas seçimi başa çatdıqdan sonra kredit üçün müraciət edə biləcəklər.

Bildirilib ki, magistraturaya qəbul olunmuş tələbələr portal.edu.az sistemi üzərindən qeydiyyat zamanı paralel olaraq e-ttkf.edu.az portalında təhsil tələbə krediti üçün də müraciət edə biləcəklər.

Fondun qaydalarına əsasən, standart təhsil tələbə kreditindən yararlanmaq üçün birinci tədris ilinin ilk semestri üzrə minimal qəbul göstəriciləri müəyyən edilib. Bu göstəricilər subbakalavrlar üçün 110 bal, bakalavriat üzrə 250 bal, magistratura üzrə 50 bal, SAT nəticələri ilə qəbul olunanlar üçün minimum 1200 bal, texniki və yüksək texniki peşə təhsili üzrə isə attestat qiymətlərinin orta göstəricisinin ən azı 3 olmasıdır. Xüsusi qabiliyyət tələb edən ixtisaslar üzrə ayrıca minimal bal tələbləri tətbiq edilir.

Fond qeyd edib ki, minimal qəbul balı yalnız standart təhsil tələbə kreditlərinə aiddir. Sosial təhsil tələbə kreditləri üçün isə belə bir tələb nəzərdə tutulmur.