AQTA donuz təsərrüfatlarında monitorinqlərə başlayır

Qida Təhlükəsizliyi Agentliyi (AQTA) avqustun 10–14-də Azərbaycanın bir sıra şəhər və rayonlarında yerləşən donuz təsərrüfatlarında epizootoloji monitorinqlər keçirəcək. Bu barədə AQTA məlumat yayıb.

Bildirilib ki, monitorinqlər təsadüfi seçmə üsulu ilə müəyyən edilmiş fərdi və fermer təsərrüfatlarında aparılacaq.

Monitorinqlər çərçivəsində təsərrüfatlarda müşahidələr aparılacaq, laborator müayinələr üçün diaqnostik nümunələr götürüləcək, həmçinin baytarlıq norma və qaydalarına əməl olunmasının vacibliyi ilə bağlı maarifləndirmə işləri həyata keçiriləcək.

AQTA qeyd edib ki, monitorinqlərin əsas məqsədi ölkənin donuzların Afrika taunu xəstəliyindən azad statusunu qorumaq, eləcə də digər xəstəliklər üzrə epizootoloji vəziyyəti qiymətləndirməkdir.

Toplanmış məlumatlar əsasında hazırlanan hesabatlar Ümumdünya Heyvan Sağlamlığı Təşkilatına təqdim ediləcək.